فساد: التوقيع مع إسلام الشاطر 2004
الصفقة دي تحديدا هتكلم فيها عن 3 نقط مهمة .. الاول ليها علاقة بدماغ الصراصير .. والتانية بالتعاقدات المحترمة .. والتالتة بنادي الدولة
سنة 2004 اسلام الشاطر كان أحد أهم نجوم الاسماعيلي والمنتخب .. بعد خسارة الاسماعيلي نهائي افريقيا قدام انيمبا كان فاضل فعقده 6 شهور .. النادي عاوز يخلص منه ويلحق يكسب فلوس واللاعب عاوز يمشي والأهلي والزمالك عاوزينه .. الأهلي كلم وكيل اللاعب اللي هو خاله واتفق معاه مبدئيا على التفاصيل .. وفي الوقت اللي المفروض انه هيخلص الصفقة جه تليفون لإسلام الشاطر من رئيس الاسماعيلي يروحله ڤيلته .. راح لقى رئيس الاسماعيلي و محافظ اسماعيلية و كمال درويش وخالد لطيف والمندوه الحسيني .. قالوله انت هتىروح الزمالك يا اسلام .. قالهم لأ انا عاوز اروح الأهلي .. حسب كلام خال اسلام الشاطر ووكيله المحافظ بنبرة تهديد قاله متخليش ابراهيم بيه يغضب ووقع يا اسلام .. وبعد ضغوط وقع اسلام الشاطر للزمالك على غير رغبته حسب تأكيده بس حط شرط جزائي .. وهنا أول نقطة بتاعة نادي الدولة .. المحافظ كان بيضغط ويهدد اللاعب لتسهيل التعاقد للزمالك مش الأهلي .
نيجي للنقطة التانية واللطيفة جدا بقى بتاعة دماغ الصراصير .. اسلام الشاطر نفسه من سنة كان مستضيف الفخراني .. وفي وسط الكلام الفخراني قام قايل جملة عجيبة جدا .. قاله انت يا كابتن تحديدا الأهلي خدك لعيب دولي فالمنتخب وقضى عليك !!
هنكمل مع اسلام ونشوف مين اللي كان هيقضي عليه .. انتقل اسلام للزمالك وكان قبل انتقاله لاعب فالمنتخب .. راح لقى نفسه بيقعد دكة لابراهيم حسن ومحمد صديق !! .. سأل ليه يا اخوانا المدرب قاله انت مش هتعرف تلعب معانا البطولة العربية لانك شاركت مع الاسماعيلي .. وحسب الكلام من ذاكرته فهو اتقيد تقريبا فافريقيا كمان بس دي مش لاقيلها مصدر نتاكد منه .. المهم انه فينجادا قاله انت مش مقيد معانا فافريقيا والبطولة العربية فانت هنا جاي احتياطي ومش هتلعب أساسي .. قاله امال جبتني ليه ده انا فالمنتخب وعندنا بطولة هقعد كل ده مبلعبش ! .. منا كنن بلعب في فرقتي وكان جايلي عروض .. قاله اه هتلعب مع بداية الموسم الجديد .. وانا بلغت الإدارة بالكلام ده وهم اللي أصروا يجيبوك .. بالصدفة اول ماتش مدافع ايده اتكسرت فمحمد صديق اللي كان باك يمين لعب مكانه ونزل اسلام شاطر باك يمين وساهم في تحويل تأخر الزمالك لفوز ب 3 أهداف .. بعد الماتش فينجادا قاله احنا على اتفاقنا وكونك لعبت وساهمت فالأهداف مش معناه انك هتلعب أساسي .. متخيل بقى ان الفريق اللي عمل كده فإسلام الشاطر من بجاحته بيقولوا الأهلي هو اللي بوظ مسيرته 
ده انت كنت هتبطله كورة وهو عنده 27 سنة !!
السؤال عمرك شوفت بجاحة كده ؟!
نكمل عشان نوصل للنقطة التالتة .. بعدها اتحاد جدة كلمه وقالوله عاوزينك تيجي تلعب معانا اعارة 6 شهور عشان الباك اليمين جاله صليبي .. قالهم عز الطلب .. كمال درويش قاله لأ مش هنسيبك .. اللي هو احنا هنبطلك كورة يعني هنبطلك كورة .. قاله انت جايبني أقعد !! .. انا عندي شرط جزائي هدفعه وامشي .. فاضطروا يتفقوا مع اتحاد جدة على الإعارة كسبوا منه قد اللي دفعوه للاسماعيلي مرتين .. رجع اسلام من السعودية وراح النادي .. كان له فلوس من قبل ما يسافر فكلم اتنين من مجلس الإدارة عشان ياخدهم .. مرضيوش .. واحد منهم بقى قاله يا اسلام انت روحت السعودية خدت قرشين كويسين كفاية عليك كده 
.. قاله يعني ايه دي فلوسي وحقي اللي متفقين عليه .. قاله يعني انت يا اسلام من اسكندرية وعارف كويس تشرب من البحر ازاي
قام أسلام مركبه قطر ستة الا تلت وخالع .. كلم القيعي قاله انا عاوز اجي الأهلي .. القيعي قاله انت عندك شرط جزائي ادفعه هتبقى فري وتعالى نتفاوض عشان يضمن انه ميساومش الزمالك بالأهلي .. قام دافع الفلوس فاتحاد الكورة وتاني يوم كان فالأهلي
وكانت دي القصة الخامسة لنادي الزمالك للتعاقدات الشريفة .. صحيح مفهاش تزوير ونيابة ومحاضر واقسام زي هاني سعيد وجدو زي الجزء اللي فات .. لكن الاهم بالنسبالي فيها حكاية فخراني اللي كان بيقول للشاطر الاهلي ضيع مستقبلك
ونموذج نادي الدولة .. ولعيبة الاسماعيلي اللي الأهلي بيسرقها
المصادر حلقتين من مذكرات القيعي والشاطر
هل اعجبك محتوى الصفحة؟
تساعدنا ملاحظاتك على تحسين محتوانا.
- المقال السابق
- المقال التالي